Ֆրանսայի մէջ մասնագիտական գործունէութիւն կատարող մեր հայրենակիցները` Սերժ Տէր Մաթեւոսեան եւ Սերժ Արուճումեան այցելած են Հայաստանի տարբեր բժշկական հաստատութիւններու մէջ բուժուող վիրաւոր զինուորներուն:
Հայաստանի առողջապահութեան նախարարութենէն յայտնած են, որ մասնագէտները ծանօթացած են զինուորներուն առողջական խնդիրներուն եւ քննարկած վերականգնողական բուժման մանրամասնութիւնները: Բժիշկները 13 սեպտեմբերին այցելած են Հայաստանի պաշտպանութեան նախարարութեան կեդրոնական զինուորական հիւանդանոց, իսկ 14 սեպտեմբերին` այցելած են «Իզմիրլեան» բժշկական կեդրոն, ուր վերջերս տեղափոխուած են զինուորական ծառայութեան ընթացքին տարբեր թուականներու վիրաւորուած եւ հաշմանդամութիւն ունեցող նախկին զինուորները:
Մասնագէտները բարձր գնահատած են հայաստանեան գործընկերներուն աշխատանքը, կիսած բուժման նոր մօտեցումներով: Բժիշկները նշած են, որ կատարուած աշխատանքին շնորհիւ յառաջիկային կարելի պիտի ըլլայ դրական արդիւնք արձանագրել: Անոնք պատրաստակամութիւն յայտնած են յառաջիկային եւս գործակցելու եւ անհրաժեշտ օժանդակութիւնը ցուցաբերելու: