«Մետիամաքս» կը հաղորդէ, որ Գերմանիոյ «Դաշինք 90»-«Կանաչներ» կուսակցութեան համանախագահ Ճեմ Էօզտեմիր ըսած է, որ Պունտըսթակի կողմէ վաւերացուած եւ Հայոց ցեղասպանութիւնը ճանչցող բանաձեւը բեկանման ենթակայ չէ՛:
«Պունտըսթակը գրեթէ միաձայնութեամբ ճանչցած է Հայոց ցեղասպանութիւնը: Ուրեմն միայն Գերմանիոյ խորհրդարանը կրնայ այդ բանաձեւը տնօրինել», ըսած է ազգութեամբ թուրք գերմանացի խորհրդարանականը: Ան նաեւ ընդգծած է, որ Գերմանիոյ դաշնակցային կառավարութիւնը կը կիսէ այն տեսակէտները, որոնք ներկայացուած են բանաձեւին մէջ:
Էօզտեմիր շեշտած է, որ բանաձեւին վաւերացումով գերմանացի խորհրդարանականները փափաքած են ընդգծել, որ ներկայ Գերմանիան նաեւ կ՛ընդունի գերմանական կայսրութեան մեղքը` Հայոց ցեղասպանութեան մէջ:
«Երբե՛ք նպատակ չենք հետապնդած մեղադրել Թուրքիոյ ներկայ իշխանութիւնները: Մենք յոյս ունինք, որ Թուրքիա պատրաստակամութիւն կը ցուցաբերէ քննարկումներ կազմակերպելու այս մասին: Կարեւոր է, որ Հայաստանը եւ Թուրքիան զարգացնեն լաւ եւ բարիդրացիական յարաբերութիւններ», նշած է ան:
Յիշեցնենք, որ Էօզտեմիր «Օսմանեան կայսրութեան մէջ 1915-ին եւ 1916-ին հայերու եւ միւս քրիստոնեայ փոքրամասնութիւններու ցեղասպանութեան յիշատակին եւ դատապարտման մասին» բանաձեւին հեղինակն է: Բանաձեւը վաւերացուած էր այս տարուան յունիս 2-ին: