Թիֆլիսի, Ախալքալաքի շրջանի Կարծախ գիւղի եւ Ախալքալաք քաղաքին մէջ 26-27 օգոստոսին տեղի ունեցած են Ջիւանիի օրուան տօնակատարութիւնները:
Այս մասին յայտնած են «Ջաւախքին աջակցութիւն» հիմնարկէն` նշելով, որ ձեռնարկներուն շարքը բացառիկ էր ու աննախընթաց: Տրուած է այցելութիւն` Թիֆլիսի մէջ գտնուող Ջիւանիի շիրիմին, կատարուած է Ջիւանիի տուն-թանգարանի բացման հանդիսաւոր արարողութիւն եւ առաջին անգամն ըլլալով` աշուղական մրցոյթ:
Ներկայ եղած են մտաւորականներ, հոգեւորականներ, արուեստագէտներ, երաժշտագէտներ, բարձրաստիճան պաշտօնեաներ` Ջաւախքէն ու Հայաստանի տարբեր շրջաններէ եւ Հայաստանէն դուրս ապրող բազմաթիւ հայրենակիցներ ու ջիւանասէրներ:
Տօնակատարութեան առաջին օրը` 29 օգոստոսին, վիրահայոց թեմի առաջնորդ Վազգէն եպս. Միրզախանեանի առաջարկով, հայ մտաւորականութեան, հոգեւոր բարձր դասի, Վրաստանի մէջ Հայաստանի դեսպանատան ներկայացուցիչները, «Ջաւախքին աջակցութիւն հիմնադրամ»-ի (ՋԱՀ) հոգաբարձուներու խորհուրդի եւ գործադիր վարչութեան ներկայացուցիչները, «Հայարտուն» մշակութային կեդրոնի ներկայացուցիչները, ինչպէս նաեւ Ջիւանիի ծոռ Գրետա Նիժալածէ այցելած են Խոջիվանքի գերեզմանատուն` Թիֆլիսի մէջ հայկական պանթէոն, ուր թաղուած է Մեծն Ջիւանի: Տապանաքարին վրայ տարածուած է հայրենի Կարծախէն բերուած հող ու ջուր:
27 օգոստոսին Ջիւանիի տօնակատարութիւններու օրը ընթացք առած է Կարծախի Սուրբ Յովհաննէս Կարապետ եկեղեցիէն, ուր սուրբ պատարագ մատուցած է վիրահայոց թեմի Ջաւախքի ընդհանուր փոխանորդութեան առաջնորդ Բաբգէն վրդ. Սալբիեան: Պատարագէն ետք յարգանքի տուրք մատուցուած եւ ծաղիկներ զետեղուած է Ջիւանիի կիսանդրիին մօտ, որմէ ետք տեղի ունեցած է Ջիւանիի տուն-թանգարանին բացման հանդիսաւոր արարողութիւնը:
ՋԱՀ-ի հոգաբարձուներու խորհուրդի նախագահ Սօս Սահակեան իր ողջոյնի խօսքին մէջ ընդգծած է տուն-թանգարանին կարեւորութիւնը` լուսարձակի տակ առնելով խորհրդային տարիներէն ետք Ջաւախքի մէջ բացուած մերօրեայ առաջին թանգարանը ըլլալու հանգամանքը: Թանգարանին մէջ ներկայացուած են մեծն աշուղի կեանքին ու ստեղծագործութիւններուն վերաբերող բազմաթիւ ուշագրաւ նմուշներ` կեանքի տարբեր շրջաններուն, հարազատներուն, ընտանիքի անդամներուն, ժառանգորդներուն առնչուող լուսանկարներ, երգերու լաւագոյն կատարողներն ու մշակողները, մեծն աշուղի մասին հրատարակուած բոլոր գիրքերն ու լաւագոյն յօդուածները, Ջիւանիի գործիքները` քեամանին եւ ջութակը, անոր մանկութեան շրջանի տարազը եւ այլն:
Ողջոյնի խօսք արտասանած են Վրաստանի քաղաքացիական հաւասարութեան եւ հաշտութեան հարցերով պետական նախարարութեան առաջին տեղակալը եւ Հայաստանի մշակոյթի նախարարի առաջին տեղակալ Արթուր Պօղոսեան:
Ջիւանիի օրուան տօնակատարութեան ծիրին մէջ աննախընթաց էր նաեւ աշուղական մրցոյթը` աշուղ Լէյլիի եւ աշուղ Ալիք Ջաւախքի մասնակցութեամբ: 29 օգոստոսին սկսած են նաեւ Ջիւանիի տուն-թանգարանի ետեւի մասի վերականգնման աշխատանքները` շնորհիւ նուիրատուներուն: ՋԱՀ-ի գործադիր տնօրէն Աշոտ Յակոբեան այս առիթով ըսած է. «Այսօր աւարտուեց տուն-թանգարանի հիմնադրման աշխատանքների առաջին փուլը, բայց միաժամանակ մեկնարկեց եւ երկրորդ փուլը»:
Նախաձեռնութիւններու շարքի «վերջին կանգառը» Ախալքալաքն էր, ուր «Ոսկէ ծիրան» փառատօնի հիմնադիր տնօրէն, բեմադրիչ Յարութիւն Խաչատրեանի նախաձեռնութեամբ 10 տարի առաջ տեղադրուած Ջիւանիի արձանին մօտ յարգանքի տուրք մատուցուած է, ներկայացուած է արձանի պատմութիւնն ու վերստին արժեւորուած ու մեծարուած` մեծն աշուղի ստեղծագործական ուղին ու ձգած ժառանգութիւնը: