Թորոնթոյի շարժապատկերի միջազգային փառատօնին փոխանցած տեղեկութիւններուն համաձայն, Հայոց ցեղասպանութեան առնչուող «Խոստումը» («The Promise») ժապաւէնին համաշխարհային անդրանիկ ցուցադրութիւնը տեղի պիտի ունենայ սեպտեմբեր 11-ին, փառատօնի կալա երեկոներէն մէկուն ընթացքին:
Նշենք, որ ժապաւէնին բեմադրութիւնը ստանձնած է «Օսքար» մրցանակի արժանացած Թերի Ճորճ, իսկ անոր գլխաւոր դերակատարներն են Քրիսչըն Պէյլ, որ նոյնպէս արժանացած է «Օսքար» մրցանակին, Օսքար Այզիք, որ շահած է «Կոլտըն Կլոպ» մրցանակը, եւ Շարլոթ Լը Պոն:
Ըստ ժապաւէնի արտադրողներուն մօտիկ աղբիւրներու` ամերիկեան շարժապատկերի սրահներուն մէջ ժապաւէնի ցուցադրութիւնը կրնայ սկսիլ դեկտեմբերին:
Գըրգ Գըրգորեանի հիմնած «Սըրվայվըլ Փիքչըրզ» («Վերապրումի Ֆիլմեր») անունով ընկերութեան առաջին ձեռնարկը հանդիսացող սոյն շարժապատկերին նկարահանումը արդէն իսկ ամբողջացած է: Ժապաւէնը պիտի ներկայացնէ սիրոյ եռանկիւնի մը իւրայատուկ պատմութիւնը, որ տեղի կ՛ունենայ Հայոց ցեղասպանութեան օրերուն: