Ուրբաթ, 20 նոյեմբեր 2015-ին, Մեծի Տանն Կիլիկիոյ Արամ Ա., իր գրասենեակին մէջ ընդունեց Միջին Արեւելքի Եկեղեցիներու ընդհանուր քարտուղար դոկտ. Հայր Միշէլ Ժալըխը: Ընդհանուր քարտուղարը վեհափառ հայրապետին շնորհակալութիւն յայտնեց, 3-4 նոյեմբեր 2015-ին Գահիրէի մէջ, իբրեւ խորհուրդին նախագահ, գործադիր վարչութեան ժողովին մասնակցութեան համար:
Վեհափառ հայրապետը յայտնեց, թէ Միջին Արեւելքի դիմագրաւած այս տագնապին մէջ ՄԱԵԽ-ը կարեւոր դերակատարութիւն ունի, եւ վստահեցուց Մեծի Տանն Կիլիկիոյ կաթողիկոսութեան պատրաստակամութիւնը զօրավիգ կանգնելու խորհուրդի աշխատանքներուն ու ծրագիրներուն:
Ընդհանուր քարտուղարը տեղեակ պահեց, թէ յառաջիկային Զուիցերիոյ կաթողիկէ եւ աւետարանական եկեղեցիներու նախագահները բարձրաստիճան պատուիրակութեան մը ընկերակցութեամբ պիտի այցելեն Լիբանան եւ հանդիպումներ պիտի ունենան Լիբանանի զանազան համայնքներու եւ հոգեւոր առաջնորդներու հետ: Ան կաթողիկոսին ցուցմունքներն ու օժանդակութիւնը խնդրեց այս այցելութիւնը առաւել եւս արդիւնաւոր դարձնելու համար: