Արցախի Հանրապետութեան Ազգային ժողովին կից երիտասարդական խորհրդարանի անդամները 12 յուլիսին Շուշի քաղաքին մէջ հանդիպում ունեցած են Ղարաբաղի մշակոյթի եւ երիտասարդութեան հարցերու նախարար Նարինէ Աղաբալեանին հետ: Այս մասին հաղորդած է Լեռնային Ղարաբաղի Ազգային ժողովի մամլոյ ծառայութիւնը:
Ողջունելով նորընտիր երիտասարդական խորհրդարանի անդամները` մշակոյթի եւ երիտասարդութեան հարցերու նախարարը ներկայացուցած է պետական երիտասարդական քաղաքականութեան հիմնական ուղղութիւններն ու առկայ մարտահրաւէրները: Խօսելով հասարակութեան ու պետութեան զարգացման գործին մէջ երիտասարդութեան դերին մասին` Նարինէ Աղաբալեան նշած է, որ երիտասարդ սերունդը պէտք է լաւ ճանչնայ երկիրը եւ իրազեկ ըլլայ, որպէսզի կարենայ արդիւնաւէտ մասնակցութիւն ունենալ անոր զարգացման ու բարգաւաճման:
Նախարարը կարեւոր նկատած է նաեւ Շուշիի` տարածաշրջանային մշակութային կեդրոնի, արուեստի ու արհեստի քաղաքի երբեմնի փառքի վերականգնումը եւ` նշած, որ այս ուղղութեամբ արդիւնաւէտ քայլ կը համարէ մշակոյթի եւ երիտասարդութեան հարցերու նախարարութեան տեղակայումը:
Երիտասարդական խորհրդարանի անդամները հետաքրքրուած են ընթացիկ ծրագիրներով, համագործակցութեան հնարաւոր ուղղութիւններով, երիտասարդութեան ու մշակոյթի մարզին առնչուող այլ հարցերով:
Այնուհետեւ, նախարարին ընկերակցութեամբ, անդամները շրջագայած են Շուշիի նախկին Մարիամեան օրիորդաց դպրոցի շէնքին մէջ, ուր այսօր տեղակայուած է նախարարութիւնը: Նարինէ Աղաբալեանը հետաքրքրական դրուագներ ներկայացուցած է կառոյցի պատմութենէն եւ երիտասարդները ծանօթացուցած է շէնքին մէջ տեղակայուած արհեստանոցին:
Օրուան ծրագիրը աւարտած է 1918-ին կառուցուած Շուշիի Ս. Յովհաննէս Մկրտիչ (Կանաչ ժամ) եկեղեցի այցելութեամբ: