Շաբաթ, 18 յունիսի երեկոյեան ժամը 6:00-ին, Ազգային Յառաջ-Գ. Կիւլպէնկեան քոլեճի շրջափակին մէջ տեղի ունեցաւ Ազգային Յառաջ մանկապարտէզի ամավերջի հանդէսն ու վկայականաց բաշխումը` ներկայութեամբ հոգեւոր հայրերու, ՀՅԴ «Կարմիր Լեռ» կոմիտէին, ազգային իշխանութեանց ներկայացուցիչներուն, Այնճարի քաղաքապետին, Ս. Պօղոս եկեղեցւոյ թաղական խորհուրդին, վարժարանիս խնամակալութեան ու տնօրէնութեան, պատկան մարմիններու ու միութիւններու ներկայացուցիչներու, ուսուցիչներու, ծնողներու ու բարեկամներու:
Լիբանանի ու Հայաստանի քայլերգներու յոտնկայս ունկնդրութենէն ետք բացման խօսքը արտասանեց վարիչ-մանկապարտիզպան Լենա Սթանպուլեանը, որ ողջունելէ ետք ներկաները` անոնց ուշադրութեան յանձնեց բեմի անտառային յարդարումը, մանկական գունագեղ աշխարհի կարգ մը հերոսներու ճամբով մատուցուելիք երաժշտախառն հեքիաթներու շարքը:
Լ. Սթանպուլեան յայտնեց, որ մանկապարտէզի քառամեայ ծրագիրին հետեւող իւրաքանչիւր մանուկ աստիճանաբար կը հարստացնէ իր գիտելիքները, կարողականութիւնը եւ մանկապարտէզին հրաժեշտ տալով` կը ստանայ իր առաջին վկայականը, որ` «պիտի լուսաւորէ իր ճանապարհը ու զինք պիտի հասցնէ բարձր դիրքերու»:
Վարիչ-մանկապարտիզպանը երախտագիտութիւն յայտնեց բոլոր անոնց, որոնք տարբեր առիթներով ու զանազան միջոցներով նեցուկ կը կանգնին վարժարանի վերելքին, մանաւանդ շնորհակալական յատուկ խօսք ուղղեց վարժարանի բարերարներուն, որոնց շարքին` Գէորգ Հ. Արապեանին, որուն նիւթական ներդրումով ընթացք առած են մանկապարտէզի բարեզարդման ու արդիականացման շինարարական աշխատանքները:
Գեղարուեստական յայտագիրի առաջին բաժինով հանդէս եկաւ Կոկոն ու Ծաղիկ դասարանի երգչախումբը, որ հմայեց ներկաները հայերէն, արաբերէն ու անգլերէն լեզուներու իր կատարումներով, խմբավարութեամբ երգի դասատու Նայիրի Հապէշեանի:
Յաջորդաբար բեմ բարձրացան Ծաղիկ դասարանի հաղորդավարներ` «Անին ու Արան» մանկական պատմութեան ամփոփ ներկայացումէն ետք պարի հրաւիրեցին Ծիլ դասարանի աշակերտները, որոնց գունագեղ տարազը զարդարուած էր Անիին ու Արային «համեղ շաքարներով»:
Յաջորդ հեքիաթը` «Ձիւնաթոյրը», Ծաղիկ դասարանի հաղորդավարներու կողմէ անգլերէնով ներկայացուեցաւ, ապա Բողբոջ դասարանի աշակերտները պարային գեղեցիկ շարժումներով աշխուժացուցին բեմը` աղջիկները Ձիւնաթոյրին պէս հագած, իսկ տղաքն ալ` փայտահատի տեսքով:
«Հեքիաթներու աշխարհ»-ը կանգ առաւ հաղորդավարներու արաբերէն լեզուով երրորդ հեքիաթի մատուցմամբ` «Կարմիր գլխարկիկ»-ին, որուն պարային ներկայացումը վստահուած էր Կոկոն դասարանին, որ իւրայատուկ մշակումով միաձուլած էր Կարմիր գլխարկիկին գուրգուրոտ վերաբերումը գայլին նկատմամբ:
Եզրափակելով հեքիաթներու շարքը` «Անին ու երեք արջուկները» ներկայացուեցաւ Ծաղիկ դասարանի պարային ելոյթով, որ արժանացաւ հանդիսատեսի ջերմ գնահատանքին:
Մանկապարտէզի շրջանաւարտ դասարանը կաունով բեմ բարձրացաւ եւ երախտագիտական խօսքերով հրաժեշտ տուաւ մանկապարտէզին:
Այնուհետեւ վարժարանի տնօրէն Արմէն Թաշճեան կամրջեց երեւակայութեան ճամբով ուրուագծուած հեքիաթային-առասպելական աշխարհն ու անոր հերոսները, հիւսուած տարբեր երանգները, որոնք իրենց վերջնական յանգումը կը կատարեն իրական աշխարհին մէջ: Տնօրէնը շրջանաւարտներուն ուղղեց իր խօսքը` դաստիարակութեան ճամբով մշտապէս ճշգրիտ ընտրութիւններ կատարելու, պայծառատես ու յստակատես ըլլալու, չմոլորելու շլացնող բազմապիսի երեւոյթներէ:
Տնօրէնը շնորհաւորեց շրջանաւարտները` անոնց առաջին վկայականը ստանալուն առթիւ, անոնց ծնողները, ուսուցիչները, վարժարանի մեծ ընտանիքը, ինչպէս նաեւ` ազնիւ բարերարները, որոնց ձեռամբ կատարուեցաւ վկայականաց բաշխումը: Հանդիսութեան աւարտին տեղի ունեցաւ հրավառութիւն:
Ծաղիկ դասարանէն վկայական ստացան.
Ալիք Համուտեան, Անդօ Քիւսպէկեան, Ասօ Սթանպուլեան, Արեւիկ Թաշճեան, Դրօ Գալեմքերեան, Երուանդ Սթանպուլեան, Լոռի Ճապրայեան, Յակոբ Գրիգոր, Նանոր Ֆստքճեան, Պարգեւ Տարագճեան, Ռալֆ-Վահէ Աշգարեան, Ռիթա Քիւսպէկեան, Սէրլի Արուշեան, Քրիստել Գազանճեան: