Վերջին տասնամեակներուն ընթացքին Մխիթարեան միաբանութեան դիմագրաւած տնտեսական եւ այլ կարգ մը հարցերու առնչութեամբ, իբրեւ նեցուկ եւ օժանդակ նման հարցերու լուծման համար, Վատիկանի կողմէ կարգուած էին, հերթաբար, մասնաւոր խորհրդականներ եւ գործակատարներ` տարբեր իրաւասութիւններով օժտուած:
Նկատի առած այն, որ այս հերթական «այցելութիւն»-ներէն ցարդ չէին քաղուած ակնկալուած վերջնական արդիւնքները, 30 ապրիլ 2016 թուակիր վճռագիրով Ֆրանչիսկոս պապը Մխիթարեան միաբանութեան համար պապական պատուիրակ նշանակեց, լիազօր իրաւասութեամբ, Պոլսոյ հայ կաթողիկէ թեմի առաջնորդ Լեւոն արք. Զէքիեանը: Պատուիրակի իրաւասութիւնները լրիւ ի զօրու կը դառնան ստորագրութեան իրաւունքով նաեւ քաղաքական ատեաններու առջեւ, 1 յունիս 2016 թուականէն սկսեալ:
Նորակոչ պաշտօնավար սրբազանը միաբանութեան առօրեայ ընթացիկ գործերուն տնտեսման համար, իբրեւ իր ներկայացուցիչները նշանակած է Ս. Ղազարու մայրավանքին, եւ առ հասարակ միաբանութեան համար, նախկին ընդհ. աբբայ Եղիա վրդ. Քիլաղպեանը, իսկ Վիեննայի մենաստանին համար` նախկին տեղական աբբայ Պօղոս վրդ. Գոճանեանը:
Լեւոն արք. կ՛օգտուի հաղորդագրութեան ընծայած այս առիթէն` խնդրելու համար բովանդակ հայ ժողովուրդին եւ, յատկապէս, Հայաստանեայց սուրբ եկեղեցւոյ բոլոր ուխտի մանկանց աղօթքը եւ հոգեւոր սրտակցութիւնը` իրեն եւ հայ ժողովուրդի հոգեւոր ու մտաւոր անդաստանին մէջ երախտաշատ Մխիթարեան միաբանութեան համար:
ԴԻՒԱՆ ՄԽԻԹԱՐԵԱՆ ՄԻԱԲԱՆՈՒԹԵԱՆ
Վենետիկ, Ս. Ղազարու Մայրավանք
31 մայիս 2016