Պատրաստեց՝ ՆԱՐԷ ԳԱԼԵՄՔԷՐԵԱՆ
Քէնթրպըրիի արքեպիսկոպոս Ճասթին Ուելպի վերջերս տուած հարցազրոյցի մը ընթացքին ըսաւ, որ Փարիզի սպանութիւններուն իր արձագանգը նախ եղած է ցնցումը, սարսափը, ապա` խոր տխրութիւնը:
Արքեպիսկոպոսը ըսաւ.
– Շաբաթ առաւօտեան ես դուրսը կը քալէի, կ՛աղօթէի եւ կ՛ըսէի.« Աստուա՛ծ, ինչո՞ւ, ինչո՞ւ ասիկա կը կատարուի: Ո՞ւր ես Դուն այս բոլորին մէջ»: Ապա կը խօսէի Աստուծոյ հետ: Այո՛, ես կը կասկածիմ:
Արքեպիսկոպոսը աւելցուց.- «Ցնցումը ուժգին էր, որովհետեւ կնոջս հետ 5 տարի Փարիզ ապրած ենք: Մեր ապրած ամէնէն երջանիկ վայրերէն մէկն էր, եւ այդպիսի վայրի մը մէջ այսքա՜ն տառապանք տեսնելը իսկապէս սրտաճմլիկ է»:
Ճասթին Ուելպի
Ահաբեկչական յարձակումէն կարճ ժամանակ ետք ֆրանսական օդուժը Սուրիոյ մէջ ՏԱՀԵՇ-ի դիրքեր ռմբակոծեց, բայց արքեպիսկոպոսը զգուշացուց հաւանական վնասակար ակնթարթային արձագանգէն: «Երկու անարդարութիւններ մէկ արդարութիւն չեն բերեր: Եթէ մենք սկսինք պատահական կերպով սպաննել անոնք, որոնք սխալ չեն գործած, ատիկա լուծումներ չ՛ապահովեր: Այնպէս որ, կառավարութիւնները պէտք է արդարութեան միջոցները ըլլան», ըսաւ ան:
«Այն եղանակը, ձեւը, որով ՏԱՀԵՇ-ի զինեալները իրենց հաւատքը կը խեղաթիւրեն, այնպէս մը, որ անոնք կը հաւատան, թէ այդ արարքները կը փառաբանեն իրենց Աստուածը, այսօրուան մեր աշխարհին ամէնէն յուսահատական երեւոյթներէն մէկն է», նշեց արքեպիսկոպոսը: