Շուշիի ազատագրման յաղթանակը, Արցախի անկախութեան 25Էամեայ երթն ու Ազրպէյճանի կողմէ սանձազերծուած ապրիլեան քառօրեայ վիժած պատերազմը անգամ մը եւս հաստատեցին, որ մեր ժողովուրդը իր սեփական ուժերուն վստահելով` կրնայ շրջել բռնապետներուն կողմէ պարտադրուած իրողութիւններն ու նուաճել ազատ, անկախ ապրելու եւ միջազգային ընտանիքին մէջ արժանավայել տեղ գրաւելու իր իրաւունքը:
Արցախի մէջ մարտնչող մեր հերոսները, հայաստանեան եւ համայն հայութեան զօրակցութեամբ, պարտութեան մատնեցին Ազրպէյճանը, որովհետեւ կը մարտնչէին իրաւունքի համար, հայրենի հողի համար: Հակառակորդը, սակայն, վարձկան ծայրայեղ մարդասպաններ առաջ մղելով, զինուորական գերարդիական սարքերով կը յարձակէր պատմական մեր հայրենիքի մէկ հատուածին տիրելու ծաւալապաշտ մղումով:
Արցախեան ազատամարտի մեր հերոսներուն սխրանքները անգամ մը եւս հաստատեցին, որ յաղթանակները պայմանաւորուած չեն ըլլար սոսկ ռազմամթերքի կամ զինուժի գերազանցութեամբ, այլեւ` մարտական ոգիի առկայութեամբ, արդար իրաւունքի, հայրենի հողի համար պայքարելու հաւատքով ու վճռակամութեամբ:
Արցախեան գոյամարտի ճակատագրական այս օրերուն, երբ թշնամին կը շարունակէ ծաւալապաշտ իր նկրտումներով սպառնալ մեր ժողովուրդին ու պարտութեան բարդոյթով տարուած` կը փորձէ տապալել բանակցային գործընթացը` գէթ զիջումներ խլելու յոյսով, հայկական կողմը զինուորական թէ քաղաքական համարժէք պատասխան տալու հրամայականին դէմ յանդիման կը կանգնի:
Զինուորական առումով Արցախի բանակը վճռական է` պահպանելու հայոց հողն ու սրբութիւնները:
Արցախի սահմանները պաշտպանող հայ զինուորին նեցուկ կանգնելու համասփիւռքեան ներուժի զօրաշարժի ենթարկումը աւելի քան անհրաժեշտ է այս օրերուն:
Քաղաքական առումով Արցախի միջազգային ճանաչման ուղղուած ջանքերը նոր թափ ու ծաւալ կը ստանան:
Այս ծիրէն ներս Հայաստանի Հանրապետութիւնն ու Հայ դատի գրասենեակները որոշակի ճամբայ հարթած են արդէն:
Այնուամենայնիւ, հասունցած է Հայաստանի Հանրապետութեան կողմէ Արցախի Հանրապետութեան պաշտօնական ճանաչման պահը, որովհետեւ Ազրպէյճանի կողմէ յարձակումներու ծաւալումն ու զինադադարի շարունակական խախտումը ամլութեան կը մատնեն Արցախի բանակցային գործընթացը, որուն տարիներ շարունակ հաւատարիմ մնաց հայկական կողմը:
Ազրպէյճան ոչ միայն չի յարգեր իր խոստումները եւ կը խախտէ բանակցութիւններու ձեւաչափը, այլեւ բանակցային գործընթացը կը փոխարինէ պատերազմով:
Ռազմաքաղաքական ներկայ իրավիճակի լոյսին տակ, Հայաստանի Հանրապետութեան կողմէ Արցախի անկախ հանրապետութեան պաշտօնական ճանաչման քննարկումները պայմանաւորուած են տագնապի զարգացումներով եւ հարցը կը տեղափոխեն քաղաքական նոր հարթութիւն:
Հայկական կողմը անգամ մը եւս կոչուած է ի՛ր ջանքերուն վստահելով` յառաջ մղելու արցախեան տագնապի հանգուցալուծումը:
Զ. Պ.