Սրբոց Հռիփսիմեանց վարժարանի աշակերտները խորազգաց յուզումով եւ ամրակուռ հաւատքով շաբաթ մը ամբողջ ապրեցան ապրիլեան յիշատակութեամբ:
Հինգշաբթի, 21 ապրիլ 2016-ին վարժարանիս շրջափակին մէջ զետեղուած խաչքարին ու Ծիծեռնակաբերդի մանրակերտին դիմաց աշակերտները երկիւղածութեամբ հետեւեցան Ս. պատարագի խորհուրդին` ի յիշատակ մեր մէկուկէս միլիոն նահատակներուն` շարականներու ու մեղեդիներու ընդմէջէն եւ վերանորոգեցին իրենց ուխտը` հաւատարիմ մնալու, Հայ եկեղեցւոյ, ազգին ու հայրենիքին:
Տեղին է յիշել, որ պատարագին սկիզբը աշակերտները իրենց ծաղիկները զետեղեցին խաչքարին դիմաց եւ կարմիր մոմերով լուսաւորեցին 100+1 խորհրդապատկերը:
Պատարագին յաջորդեց գեղարուեստական յայտագիր մը` ասմունքներով, երգերով ու նուագով, աշակերտութիւնը միասնաբար պանծացուց անցեալի եւ ներկայ մեր հերոսներուն գերմարդկային արիութիւնը, անձնուրաց, անվեհեր նուիրումն ու զոհաբերումը, յատկապէս` Արցախի մեր քաջարի մարտիկներուն:
«Կը յիշեմ ու կը պահանջեմ» անժամանցելի կարգախօսը իւրացուցած եւ յաւերժօրէն ապրելու յանձնառութեամբ, անգամ մը եւս Հռիփսիմեանց աշակերտութիւնը վճռականօրէն հաստատեց շարունակել իր նախնիքներուն ուղին` համոզուա՛ծ, թէ պիտի հասնի Արարատի վեհ գագաթին ու Արցախի ամբողջական ազատագրումին:
Ոգեկոչման հանդիսութիւնը աւարտեցաւ «Հանգչեցէ՛ք դուք անդորր, նահատա՛կ եղբայրներ» հոգեզմայլ շարականով: