Ուրբաթ, 22 ապրիլի յետմիջօրէին, Ազգ. Լեւոն եւ Սոֆիա Յակոբեան քոլեճին մէջ բացումը կատարուեցաւ սուրիահայ աշակերտներու գարնանային դպրոցին:
Դպրոցը կը համախմբէ Պուրճ Համուտ եւ շրջակայքը բնակող 155 սուրիահայ փոքրիկներ, որոնք 11 շաբթուան ընթացքին, շաբաթական երկօրեայ դրութեամբ (ուրբաթ կէսօրէ ետքերը եւ շաբաթ առաւօտները), պիտի հետեւին դաստիարակչական յատուկ ծրագիրի` բարելաւելու համար ուսումնական-կրթական իրենց մակարդակը:
Դպրոցին բացումը նախաձեռնութիւնն է Ազգ. Լեւոն եւ Սոֆիա Յակոբեան քոլեճին, գործակցութեամբ «Հաուըրտ Գարակէօզեան» հաստատութեան եւ նիւթական հովանաւորութեամբ MECC-ի` Միջին Արեւելքի եկեղեցիներու խորհուրդին: Դպրոցին ծրագիրը կ’ընդգրկէ անգլերէն լեզու, անգլերէնով ուսողութիւն եւ գիտական նիւթեր, ընդհանուր զարգացման գիտելիքներ, արուեստներ եւ մարմնակրթութիւն: 155 աշակերտեր, վեց դասարաններու մէջ բաժնուած, օրական պիտի կատարեն երեքական պահ: Նախատեսուած են նաեւ արտադպրոցական պտոյտներ եւ հաճելի ժամանցի պահեր:
Դպրոցին բացման հանդիսութեան ներկայ գտնուեցան Միջին Արեւելքի եկեղեցիներու խորհուրդի ներկայացուցիչներ` Սամեր Լահամ եւ Սեդա Խտըշեան, «Հաուըրտ Գարակէօզեան» հաստատութեան տնօրէն Սերոբ Օհանեան, գարնանային դպրոցի անձնակազմը, սուրիահայ փոքրիկներ, ծնողներ եւ հարազատներ:
Այս առիթով խօսքեր արտասանեցին տնօրէններ` Վիգէն Աւագեան, Սերոբ Օհանեան եւ Սամեր Լահամ:
Ազգ. Լեւոն եւ Սոֆիա Յակոբեան քոլեճի տնօրէն Վիգէն Աւագեան յայտնեց, որ սուրիահայ աշակերտներու յատուկ գարնանային դպրոցը սովորական դպրոցներէ տարբեր է իր առաջադրանքով, որովհետեւ ան կը նպատակադրէ մանկավարժական արդի մեթոտներով եւ մասնագէտ անձնակազմով գիտելիք, արուեստներ եւ զանազան հմտութիւններ փոխանցել պատանիներու, որոնք սուրիական պատերազմի արհաւիրքէն փախուստ տալով` ապաստանած են Լիբանան եւ հասկնալի դժուարութիւններ կը դիմագրաւեն իրենց նոր միջավայրին ընտելանալու համար:
Շարունակելով, տնօրէն Վիգէն Աւագեան նշեց, որ Ազգ. Լեւոն եւ Սոֆիա Յակոբեան քոլեճը սուրիական տագնապի առաջին օրէն իր դռները եւ սրտերը լայն բացած է սուրիահայ պարագաներու դիմաց: Անցնող չորս տարիներուն, համեմատական կերպով, ան ամէնէն մեծ թիւով սուրիահայ աշակերտները ընդունած է իր յարկին տակ, յաճախ կազմակերպելով նաեւ յատուկ դասընթացքներ` սուրիահայ աշակերտներու կրթական կարիքները բաւարարելու համար: Այս դպրոցը իր տեսակին մէջ չորրորդն է եւ միաժամանակ մեծագոյնն է, քանի ան կը համախմբէ 155 աշակերտներ:
Տնօրէն Վիգէն Աւագեան մաղթեց, որ սուրիական տագնապը յանգի իր արագ լուծման եւ բոլոր գաղթականները վերադառնան իրենց հարազատ տուներն ու դպրոցները: Մինչ այդ, իբրեւ կրթական պատասխանատուներ, ան հաստատեց, որ մեր ձեռքերը միշտ երկարած պիտի մնան հասնելու համար սուրիահայ բոլոր պարագաներուն, անխտիր:
«Հաուըրտ Գարակէօզեան» հաստատութեան տնօրէն Սերոբ Օհանեան ողջունեց ներկայ սուրիահայերը եւ յայտնեց, որ «Գարակէօզեան» հաստատութիւնը, ինչպէս անցնող չորս տարիներուն, այսօր եւս կը ջանայ հասնիլ սուրիահայ ազգակիցներու ընկերային, բժշկական եւ խնամատարական կարիքներուն: Հաստատութիւնը միշտ եղած է հայ աշակերտի կողքին: Այսօր սուրիահայ աշակերտը ունի յաւելեալ կարիքներ, որոնց բաւարարման համար կը ստեղծուի գարնանային դպրոցը` Ազգ. Լեւոն եւ Սոֆիա Յակոբեան քոլեճին հետ գործակցաբար: Օհանեան յաջողութիւն մաղթեց դպրոցին աշխատանքներուն եւ թելադրեց առաւելագոյնս օգտուիլ անոր օգտաշատ ծրագիրէն:
Իր կարգին, Միջին Արեւելքի եկեղեցիներու խորհուրդի ներկայացուցիչ Սամեր Լահամ շեշտեց նման դպրոցներու կազմակերպման անհրաժեշտութիւնը` սուրիացի գաղթականներու օժանդակութեան համար: Ան ըսաւ, որ կրթական կեանքը յատուկ կարեւորութիւն պէտք է ունենայ Լիբանան ապաստանած սուրիացի փոքրիկներուն համար, որոնք ուսման ճամբով միայն պիտի կարենան ապահով եւ կայուն ապագայ մը ունենալ: Ուսումը զիրենք պիտի օժտէ այնպիսի հմտութիւններով եւ կարողութիւններով, որոնց շնորհիւ անոնք պիտի յաջողին յաղթահարել իրենց դէմ ցցուած բոլոր դժուարութիւնները, նշեց ան:
Բացման հանդիսութեան պաշտօնական խօսքերէն ետք ներկայ փոքրիկները զուարճացան աճպարար Քրիստինի խաղերով եւ կախարդական հնարքներով:
Ապա, այս առիթով պատրաստուած հիւրասիրութիւնը վայելելէ ետք, բոլորը տուն մեկնեցան գոհունակ տրամադրութիւններով` կրթական-ուսումնական արդիւնաւէտ փորձառութիւն մը ունենալու յոյսով:
Գարնանային դպրոցին դասընթացքները սկսան շաբաթ, 23 ապրիլի առաւօտեան: