ՎԱՀՐԱՄ ԷՄՄԻԵԱՆ
Ամբողջ աշխարհը լքեց Աֆրինի քիւրտերը: Ռուսիան իր ուժերը ամբողջովին հեռացուց շրջանէն` թրքական բանակին արտօնելով անարգել շարժիլ: Քիւրտերու «հովանաւոր» Միացեալ Նահանգները սկիզբը ընդգծեցին` «Աֆրինը մեր գործողութիւններու շրջագիծին մէջ չէ», այդպիսով «կանաչ լոյս» տալով Անգարային, ապա անոնց բանակի կեդրոնական հրամանատարութեան ղեկավար Ժոզեֆ Վոթըլ ո՛չ միայն վերահաստատեց այդ խօսքը, այլ նաեւ աւելցուց, որ իր երկիրը Աֆրինին մեծ կարեւորութիւն չ՛ընծայեր: Ամերիկացիները մինչեւ իսկ Եփրատի արեւելեան ափին գտնուող քրտական ուժերուն արգիլեցին իրենց եղբայրներուն օժանդակութեան փութալ: Փենթակոնի բանբեր հազարապետ-զօրավար Ռենքին Կալաուէյ յայտարարեց. «Եթէ քրտական ուժերը շարժին դէպի Աֆրին, անոնք այլեւս պիտի չնկատուին մեր գործընկերները»: Ահա այսպիսի ստոր քաղաքականութեան մը զոհը դարձան Աֆրինի որբացած քիւրտերը:
Տիրող կացութեան մէջ անոնք բնականաբար ունէին երկու ընտրանք. կոտորուիլ կամ յանձնուիլ Սուրիոյ կառավարութեան: Անոնք ընտրեցին երկրորդը: Չորեքշաբթի, 24 յունուարին, Աֆրինէն քրտական աղբիւր մը «Մայատին»-ին յայտնեց, որ իրենք կ’ողջունեն Դամասկոսի հետ համաձայնութեան մը ծիրին մէջ սուրիական բանակին մուտքը Աֆրին: Յաջորդ օրը այդ կեցուածքը ստացաւ աւելի պաշտօնական բնոյթ. Աֆրինի ինքնակառավարման մարմինը յայտարարեց, որ քաղաքը Սուրիոյ անքակտելի մասն է, եւ Սուրիոյ պետութեան կոչ ուղղեց պաշտպանելու Թուրքիոյ հետ իր սահմանը, իմա՛` զիրենք: Այդ յայտարարութիւնները կու գան ընդգծելու այն ծանօթ իրողութիւնը, որ զինուորական գետնի վրայ կացութիւնը անյուսալի է: Սուրիոյ արտաքին գործոց փոխնախարար Ֆայսալ Մըքտատի այն յայտարարութիւնը, թէ իր երկրին օդուժը պատրաստ է արժանի հակահարուած տալու Թուրքիոյ, քիւրտերուն կոչին դրական ընկալման մասին կը յուշէ:
Անգարա վարչապետի եւ արտաքին գործոց նախարարի մակարդակով տողատակի սպառնաց Դամասկոսին` ընդգծելով, որ թրքական բանակը պիտի չյարձակի սուրիական բանակի դիրքերուն դէմ, եթէ անիկա իր դէմ քայլերու չդիմէ: Միւս կողմէ, ամերիկեան կողմը Անգարան զգուշացուց Մընպեժի դէմ գործողութիւն շղթայազերծելէ, իսկ թրքական կողմը կոչ ուղղեց ամերիկեան ուժերը հեռացնելու այդ քաղաքէն:
Յառաջիկայ օրերու հորիզոնին վրայ կ’ուրուագծուի Անգարա-Դամասկոս եւ Անգարա-Ուաշինկթըն զինուորական կամ դիւանագիտական-քաղաքական ճակատումի մը կարելիութիւնը: Կը մնայ տեսնել, թէ «Ձիթենիի ճիւղ»-ը ինչպիսի՛ ճիւղաւորումներ պիտի ստանայ եւ ինչպիսի՛ պտուղներ պիտի տայ: Աֆրինի քիւրտերուն կը մնայ տոկալ ու համբերել` տեսնելու համար, թէ փրկութեան լաստ մը պիտի գա՞յ, իսկ եթէ այո` ուրկէ՞ պիտի գայ: