Մեր Համագործակցութիւնը Միտուած Է Ներքին Ու Արտաքին Մարտահրաւէրների Դիմակայմանը

ՀՅ Դաշնակցութեան Արցախի ԿԿ ներկայացուցիչ, ԱՀ ԱԺ «Դաշնակցութիւն» խմբակցութեան անդամ Դաւիթ Իշխանեանն ամփոփել է անցնող տարին:

ՀԱՐՑՈՒՄ.- Ինչպէ՞ս էք գնահատում տարին` ղարաբաղեան հիմնախնդրի կարգաւորման տեսանկիւնից:

ՊԱՏԱՍԽԱՆ.- Խօսելով 2017 թուականի մասին` չենք կարող շրջանցել 2016 թուականի ապրիլեան իրադարձութիւնները եւ դրան յաջորդած ժամանակաշրջանը: Լուրջ ակնկալիքներ ունենալու որեւէ միտում մենք չունէինք, մանաւանդ` նկատի առնելով այն փաստը, որ 2016 թուականի ապրիլից յետոյ կայացած Վիեննայի եւ Ս. Փետերպուրկի հանդիպումների ժամանակ ձեռք բերուած պայմանաւորուածութիւններն այդպէս էլ մնացին զուտ պայմանաւորուածութիւններ:

Ի հարկէ, կարելի է առանձնացնել նաեւ այն առաջընթացը, որն արտացոլուեց նախագահների եւ արտաքին գործերի նախարարների հանդիպումների մակարդակով: Այնուհանդերձ, այստեղ պէտք է նկատի առնել նաեւ այն, որ Ազրպէյճանը փորձում էր դէպի փակուղի տանել ղարաբաղեան հիմնախնդրի բանակցային գործընթացը: 2017 թուականի հայկական դիւանագիտութեան որոշակի առաջընթացին զուգընթաց` ազրպէյճանական դիւանագիտութիւնը նահանջ էր ապրում: Այդ հանգամանքը, որպէս այդպիսին, լուրջ եւ շօշափելի արդիւնքներ չի ապահովել, բայց, այնուհանդերձ, ընդհանուր կայունութեան, խաղաղութեան եւ նաեւ սթաթուս քուոյի ապահովման առումով ունեցել ենք կարեւոր ձեռքբերում:

Հ.- 2017 թուականին Արցախի ներքին քաղաքական կեանքում ի՞նչ իրադարձութիւններ կ՛առանձնացնէիք:

Պ.- Տարին հիմնականում ողողուած էր սահմանադրական բարեփոխումների եւ նախագծի` դրան յաջորդած քաղաքական անցուդարձերով. նախագահի ընտրութիւն, կառավարութեան կազմաւորում եւ օրէնսդրական փոփոխութիւնների գործընթաց:

Հ.- Չնայած որ Դաշնակցութիւնը դէմ է քուէարկել սահմանադրութեան նախագծին, այնումենայնիւ մնաց որպէս իշխանութեան մի մաս: Արդեօ՞ք այդ կեցուածքը չի ազդել միւս իշխանական կուսակցութիւնների հետ համագործակցութեան վրայ:

Պ.- Ժամանակին մենք տուել ենք սահմանադրութեան նախագծին դէմ լինելու եւ Դաշնակցութեան իշխանութեան մաս մնալու հանգամանքի մասին բոլոր մեկնաբանութիւններն ու բացատրութիւնները: Խօսել ենք նաեւ ապագայ անելիքների մասին, եւ նշեմ, որ ոչ միայն Դաշնակցութիւն-իշխանութիւն, այլ նաեւ Դաշնակցութիւն-քաղաքական այլ ուժեր յարաբերութիւնների պարունակում որեւէ փոփոխութիւն եւ քաղաքական յարաբերութիւնների նահանջ չի արձանագրուել: Մենք բնականոն ընթացքով շարունակում ենք մեր համագործակցութիւնը խորհրդարանական եւ արտախորհրդարանական քաղաքական ուժերի հետ:

Մեր համագործակցութիւնը միտուած է հիմնականում երկրի ներքին ու արտաքին մարտահրաւէրների դիմակայմանը, եւ, այդ իսկ առումով, սահմանադրական բարեփոխումները եւ նոր սահմանադրութեան ընդունումը չէին կարող խաթարել այդ մարտահրաւէրներին դիմակայելու ուղղութեամբ քաղաքական համագործակցութեան հեռանկարները:

Հ.- Դաշնակցութիւնն առաջադրեց Բակոյ Սահակեանի թեկնածութիւնը: Ի՞նչ ակնկալիքներ ունէք ԱՀ նախագահից:

Պ.- Հերթական անգամ առաջադրելով եւ ընտրելով Բակօ Սահակեանի թեկնածութիւնը` մենք որեւէ նոր շեշտադրումների, նոր ակնկալիքների եւ ձեւակերպումների անհրաժեշտութիւն չունէինք:

Դաշնակցութեան ակնկալիքները նախագահ Բակօ Սահակեանից` շարադրուել են դեռեւս 2007 եւ 2012 թուականներին: Այն ուղղութիւնները, որոնք մենք որդեգրել էինք անցած 10 տարիների ընթացքում, ամրագրել էինք մեր համագործակցութեան դաշտում: Բնականաբար, հէնց այդ ուղղութիւններն էին մեզ համար գերակայ` ներքին եւ արտաքին հիմնախնդիրների յաղթահարում, տնտեսական կայունութիւն, քաղաքական համախոհութեան մթնոլորտի պահպանում: Նշուածս ոլորտներում յաջողութիւնների արձանագրման եւ հիմնախնդիրների հանգուցալուծման անհրաժեշտութիւնից էր բխում Բակօ Սահակեանի թեկնածութեան առաջադրումը եւ հետագայ պաշտօնաւորումը:

Հ.- Գո՞հ էք նորակազմ կառավարութեան կազմից:

Պ.- Դժուար է գնահատական տալ մի քանի ամսուայ կեանք ունեցող կառավարութեան գործունէութեանը: Մեր գնահատականը, կարծում եմ, կարող ենք տալ նուազագոյնը 1 կամ 1,5 տարի անց:

Այստեղ կ՛ուզենայի մէկ անգամ եւս բարձրաձայնել մի կարեւոր հանգամանքի մասին: Մեզ այդպէս էլ չյաջողուեց սահմանադրութեան նախագծում կառավարութեան կառուցուածքի ձեւաւորումը վերապահել խորհրդարանին, սակայն Բ. Սահակեանի կողմից ներկայացուած ծրագիրը յուսադրող է առաջիկայ 2,5 տարուայ համար: Պէտք է փորձենք մասնակիցն ու աջակիցը լինել կառավարութեան յաջողութիւնների արձանագրմանը:

Հ.- Դաշնակցութեան ներկայութիւնն Արցախում լայնատարած է. ունէք կոմիտէութիւններ Արցախի բոլոր շրջաններում: Տարուայ կտրուածքով ի՞նչ գործունէութիւն են ծաւալել կուսակցական կառոյցները:

Պ.- Որպէս քաղաքական ուժ` ՀՅԴ Արցախի կառոյցի հարցերի հարցը մնում է երկրի ներքին եւ արտաքին մարտահրաւէրների դիմակայմանը ուղղուած գործունէութեան դաշտի ապահովումը: Դրանից զատ` իւրաքանչիւր շրջան սահմանում է իր տարեկան ծրագիրը` տեղական եւ տեղայնական մի շարք հիմնախնդիրներ հաշուի առնելով:

2017 թուականին սահմանադրական բարեփոխումների գործընթացից զատ` ՀՅԴ Արցախի կառոյցը որոշակի քննարկումների դաշտ է ապահովել երկու կարեւոր հարցերի շուրջ` տեղական ինքնակառավարման մարմինների մասին օրէնքի ընդունման եւ գիւղի ու գիւղատնտեսութեան նկատմամբ որդեգրուելիք նոր քաղաքականութեան արմատաւորման հարցերի շուրջ: Այս երկու հարցերը դարձել են Արցախի ներկուսակցական քննարկումների նիւթ, որի շուրջ աստիճանաբար բիւրեղանում են նաեւ մեր ընդհանուր տեսակէտները, իսկ ապագայում` նաեւ կեցուածքը:

Հ.- Ի՞նչ ձեռքբերում է գրանցել այս տարում ՀՅԴ Արցախի երիտասարդական միութիւնը:

Պ.- Ինչպէս եւ մեր շրջանային կառոյցները, այնպէս էլ երիտասարդական միութիւնն ունի իր տարեկան ծրագիրը: Տարեկան ծրագրին մաս են կազմում ոչ միայն ներարցախեան, այլ նաեւ համահայկական միջոցառումները, որոնք իրականացնում կամ որոնց մասնակիցն են դառնում արցախցի դաշնակցական երիտասարդները: Համահայկական այդ ձեռնարկների մի մասը իրականացւում է Արցախում` այդպիսով մասնակից դարձնելով ոչ միայն դաշնակցական, այլ նաեւ տարբեր երիտասարդական միութիւնների ներկայացուցիչներին:

ՀՅԴ Արցախի երիտասարդական միութիւնը Արցախի երիտասարդական դաշտը ամբողջականացնող, բիւրեղացնող եւ համախմբող կառոյցն է հանդիսացել: Նա միշտ էլ եղել է առաջնորդողի եւ դրօշակիրի դերում: Այդ դերը վերջին տարիներին որոշակիօրէն նուազել է, եւ առաջիկայում մենք պէտք է լուրջ ուշադրութիւն դարձնենք Դաշնակցութեան երիտասարդական միութեանը, մանաւանդ` նկատի առնելով այն հանգամանքը, որ հայ իրականութեան մէջ դաշնակցական երիտասարդը միշտ ունեցել է իր տեղն ու դերը: Սա պէտք է լինի ոչ միայն անցեալի, այլ ներկայի եւ ապագայի իրողութիւն:

Հ.- Գալիք տարում ի՞նչ նպատակներ է իր առաջ դրել ՀՅԴ Արցախի կառոյցը` ներկուսակցական կեանքի եւ երկրի զարգացման առումով:

Պ.- ՀՅ Դաշնակցութեան նպատակները որդեգրուել են դեռեւս 127 տարի առաջ եւ միտուած են համահայկական նպատակների եւ հեռանկարային ծրագրերի իրականացմանը:

Լինելով համահայկական կառոյցի մի փոքր մասնիկ` ՀՅԴ Արցախի կառոյցը առաջնորդւում է Դաշնակցութեան ընդհանուր եւ շրջանային ժողովների որոշումներով ու բանաձեւերով, որոնք միտուած են ներազգային, ներպետական եւ ներկուսակցական հարցերին:

2018 թուականի յունուարին տեղի է ունենալու ՀՅԴ Արցախի կառոյցի շրջանի գերագոյն ժողովը, որտեղ կը քնարկուեն անցած երկու տարուայ կատարուած աշխատանքները, կը տրուեն գնահատականներ եւ կը սահմանուեն առաջիկայ երկու տարուայ անելիքները` համապատասխան որոշումների եւ բանաձեւերի ընդունմամբ:

Հ.- Ի՞նչ պատգամ ունէք Արցախի ժողովրդին 2018 թուականի շեմին:

Պ.- Շնորհաւորում եմ մեր ժողովրդին, հայ զինուորին գալիք Նոր տարուայ եւ Սուրբ Ծննդեան տօների առիթով: Յուսանք, որ 2018 թուականը հայ ժողովրդի համար կը լինի յաջողութիւնների, առաջընթացի, նաեւ ձեռքբերումների տարի` քաղաքական, տնտեսական եւ բոլոր առումներով: