Ո՛չ երկարակեցութիւնը իբրեւ կազմակերպական ու գաղափարական կենսունակութեան ապացոյց կ՛ուզենք վկայակոչել, ո՛չ ալ հերոսական անցեալի մը պսակներով կ՛ուզենք փառաւորուիլ:
Այո՛, 125 տարեկան ենք, այո՛, այդ ամբողջ տարիներուն մեզի վիճակուած է հայ ժողովուրդի ամէնէն բախտորոշ ժամանակներուն պատասխանատուութեան կարեւոր բաժին վերցնել, եւ այո՛, այդ պատասխանատուութեան չափով տէր ենք մեր ժողովուրդի բոլոր յաղթանակներուն ու բոլոր պարտութիւններուն, բոլոր կորուստներուն ու բոլոր ձեռքբերումներուն:
Այսօր մենք մեր ժողովուրդին կը ներկայանանք ժամանակի մարտահրաւէրները դիմագրաւելու մեր այսօրուան յանձնառութիւններով.
Հայաստանի եւ Արցախի հանրապետութիւններուն անվտանգութեան երաշխիքներու ամրապնդումը այսօր կը հանդիսանայ մեր գործունէութեան դաշտի կարեւորագոյն բաժինը: Ռազմական գետնի վրայ սահմաններու պաշտպանութեան գործին դաշնակցութիւնը կը նուիրաբերէ բարոյական ուժի եւ մարտունակութեան իր ողջ աւանդը` հայ զինուորին ու հայոց բանակին թիկունքը հզօրացնելու աշխատանքներով: Քաղաքական գետնի վրայ իր սփիւռքեան կառոյցներով կը նախաձեռնէ Հայաստանի Հանրապետութեան միջազգային յարաբերութիւնները ընդլայնող, այդ հարթութեան վրայ հայրենի պետութեան վարկն ու հեղինակութիւնը բարձրացնող քարոզչական ու յարաբերական աշխատանքներու: Նոյն այդ սփիւռքեան կառոյցները հետեւողական ճիգերով կ՛աշխատին` քայլ առ քայլ իրականացնելու Արցախի Հանրապետութեան միջազգային ճանաչումը:
Հայոց պահանջատիրական պայքարի անվիճելի յառաջապահը կը մնայ Հայ յեղափոխական դաշնակցութիւնը, որ հայ ժողովուրդին դէմ գործուած Ցեղասպանութեան միջազգային ճանաչման ճամբով թրքական իշխանութիւններուն կողմէ մեր հողային, բարոյական ու նիւթական վնասներու հատուցման հասնելու կը ձգտի` կորսուած հայրենիքին վերատիրանալու անշեղ տեսլականով:
Սփիւռքեան համայնքներու մէջ մերթ պաշտպանութեան օղակներ կազմելով, մերթ մշակութային ու կրթական կեանքի աշխուժացման խթան դառնալով եւ մերթ տագնապահար շրջաններուն թեւ ու թիկունք դառնալու համազգային նախաձեռնութեանց շարժիչներէն հանդիսանալով` Հայ յեղափոխական դաշնակցութիւնը ազգային միասնականութեան գաղափարի դարբնումին կը բերէ գործնական ներդրում: Երէկ Լիբանանի հայութիւնը ամէնօրեայ սպառնալիքներ կը դիմագրաւէր, ապա իրաքահայութեան վերապահուեցան ծանր օրեր, որոնց հետեւեցաւ Սուրիոյ գլխուն նիւթուած աղէտը, որ կրնար քայքայել ամէնէն կազմակերպուած հաւաքականութիւնները: Համահայկական զօրակցական աշխատանքներուն մէջ Հայ յեղափոխական դաշնակցութիւնը առանձնացաւ իբրեւ կազմակերպութիւն մը, որ իր բոլոր հնարաւորութիւններով տէր կանգնեցաւ այդ համայնքներուն` վերցնելով ապահովական, տնտեսական եւ քաղաքական պարտականութիւններ:
Այսօր չենք ուզեր յոխորտալ, որ 125 տարի ապրած ու գործած կուսակցութիւն ըլլալով` երաշխաւորուած կը համարենք Դաշնակցութեան յաւերժութիւնը: Բայց կը վստահեցնենք, որ հայ ժողովուրդը, երբ ինքզինք գտնէ ծանր վիճակի մէջ, երբ Հայաստանն ու Արցախը համազգային զօրաշարժի անհրաժեշտութեան առաջ կանգնին, երբ հայկական որեւէ հաւաքականութիւն վտանգուած զգայ, Դաշնակցութիւնը այնտե՛ղ պիտի ըլլայ, պիտի գործէ ու պայքարի անտեղիտալի հաւատքով:
Նաեւ կը վստահեցնենք, որ Դաշնակցութիւնը պիտի տեսնէ իրագործումը հայ ժողովուրդի ազգային բոլոր իղձերուն, որոնց կենսագործման մէջ է իսկապէս իր գոյութեան իմաստը: