Երեքշաբթի, 22 նոյեմբեր 2016-ի առաւօտուն, Արամ Ա. վեհափառ հայրապետը իր գրասենեակին մէջ ընդունեց այցելութիւնը Զուիցերիոյ բողոքական եկեղեցիներու նախագահ դոկտ. Կոտֆրիտ Լոխըրը: Հանդիպումը առիթ մը եղաւ անդրադառնալու հայ եւ զուիցերիական եկեղեցիներու պատմական յարաբերութեանց եւ յատկապէս Հայոց ցեղասպանութեան 100-ամեակի առիթով զուիցերիական եկեղեցիներուն կողմէ կատարուած շարք մը նախաձեռնութիւններուն եւ այդ ծիրէն ներս` վեհափառ հայրապետին Զուիցերիա տուած այցելութեան:
Նորին սրբութիւնը եւ դոկտ. Լոխըրը նաեւ քննարկեցին Մեծի Տանն Կիլիկիոյ կաթողիկոսութեան եւ Զուիցերիոյ բողոքական եկեղեցիներու գործակցութիւնը աւելի ծաւալելու կարելիութիւնները:
Ապա դոկտ. Կոտֆրիտ Լոխըրը ճաշի հիւրը եղաւ վեհափառ հայրապետին:
Յայտնենք, որ յատկապէս Հայոց ցեղասպանութեան շրջանէն սկսեալ սերտ գործակցութիւն գոյութիւն ունի Մեծի Տանն Կիլիկիոյ կաթողիկոսութեան եւ Զուիցերիոյ եկեղեցիներուն միջեւ: «Արմենոֆաս» մարդասիրական կառոյցը յիշեալ գործակցութիւնը կը շարունակէ բնականաբար նոր մօտեցումներով եւ առաջնահերթութիւն տալով մեր օրերու ընկերային ծառայութեան կարիքներուն: