Վերջին շաբաթներուն Համազգայինի «Լ. Շանթ» եւ «Ն. Աղբալեան» կեդրոններուն մէջ իւրօրինակ եռուզեռ կը տիրէ: «Բ. Կանաչեան» երաժշտանոցի, «Թ. Ռոսլին» եւ «Գայեանէ» պարի դպրոցի կողքին, աշակերտութեան առջեւ իր դռները բացաւ նաեւ «Արեգ» թատերական դպրոցը: Դպրոցի պատասխանատու, բեմադրիչ Ռոպերթ Առաքելեան «Լ. Շանթ» եւ «Ն. Աղբալեան» կեդրոններուն մէջ ծնողներուն եւ նորեկ աշակերտութեան ծանօթացուց դպրոցին գործունէութիւնը, ծրագրային կառուցուածքը ու աշխատանքային դրութիւնը:
Թէեւ արձանագրուող աշակերտութեան թիւը բաւարար է, սակայն բեմադրիչին կարծիքով` «Պէտք չէ բաւարարուիլ թիւով, հարկաւոր է այցելել դպրոցները, հանդիպիլ աշակերտներուն հետ, լուսաբանել դպրոցի ծրագիրն ու նպատակները, գտնել թատերասէր աշակերտները` ցոյց տալով անոնց «Արեգ» թատերական դպրոց տանող ճամբան»:
Ռոպերթ Առաքելեան տարբեր օրերու այցելեց Ազգային «Եղիշէ Մանուկեան», «Աբգարեան», «Ա. Գասարճեան», «Քառասուն Մանուկ», «Ս. Յակոբեան», Հայ Աւետ. Կեդրոնական բարձրագոյն, Հայ կաթողիկէ «Ս. Ագնէս» եւ Մեսրոպեան վարժարաններ:
Բազմաթիւ աշակերտներ խանդավառուելով բեմադրիչին բացատրութիւններէն` գտան իրենց սիրած արուեստի տեսակը եւ փութացին արձանագրուիլ Համազգայինի զոյգ կեդրոններուն մէջ գործող «Արեգ» թատերական դպրոցը:
Յառաջիկային բեմադրիչ Ռոպերթ Առաքելեան պիտի այցելէ նաեւ Հայ կաթողիկէ Հռիփսիմեանց, Հայ Աւետ. Շամլեան-Թաթիկեան եւ Ազգային Ս. Խանամիրեան վարժարաններ:
«Արեգ»-ը կը սպասէ բոլոր թատերասէր աշակերտները:
ԹՂԹԱԿԻՑ