Օրեր առաջ քոլեճի Ը. դասարանը, հայոց լեզուի իր դասատուին` Սալբի Թաշճեանին հետ ուղղուեցաւ Պօղոս Սնապեանի տուն-թանգարան: Աշակերտները դիմաւորեց գրագէտին կինը` Աղաւնի Սնապեան, որ տուն-թանգարանին դռները բանալով` ներս հրաւիրեց զանոնք, որպէսզի մօտէն ծանօթանան «Սնապեանական» յորդառատ գրական ժառանգութեան:
Պօղոս Սնապեանի անձին, ստեղծագործական ու խմբագրական աշխատանքին, ինչպէս նաեւ տուն-թանգարանի շինարարութեան մասին աշակերտները բաւական տեղեկութիւն ստացան Սալբի Թաշճեանէն, որ Պօղոս Սնապեանի գրականութեան վերջին ուսանողներէն եղած է Հայագիտական բարձրագոյն հիմնարկէն ներս:
Աշակերտները ուշի-ուշով հետեւեցան տրուած բացատրութիւններուն, ապա առանձին շրջեցան տուն-թանգարանէն ներս եւ հարցումներ ուղղեցին Աղաւնի Սնապեանին: Անոնք գոհունակ վերադարձան վարժարան, շարունակեցին կարդալ Պօղոս Սնապեանի ստեղծագործութիւններէն ու իրենց տպաւորութիւնները յանձնեցին թուղթին: