«ԱԿՈՒՆՔ», «ԷՐՄԵՆԻՀԱՊԵՐ»
Պատմական Հայաստանի Սեբաստիա նահանգի Զառա շրջանին մէջ գտնուող հայկական գերեզմանատան մէջ, երկարատեւ դադարէ մը ետք, հոկտեմբեր 29-ին հոգեհանգիստի արարողութիւն մը տեղի ունեցաւ:
Թրքական «Հապերթիւրք» լրատուական կայքը կը տեղեկացնէ, որ արարողութեան մասնակցելու համար Զառա այցելած է պոլսահայերու 38 հոգինոց խումբ մը` յարգանքի տուրք մատուցելով այդ գերեզմաններուն մէջ հանգչող իրենց նախնիներուն:
Հոգեհանգիստի կարգը մատուցելէ ետք ելոյթ ունեցած է Զոհրապ վրդ. Ճիւանեան` նշելով, որ գերեզմանոցին մէջ վերջին անգամ յուղարկաւորութիւն կատարուած էր 1958-ին:
«Ակօս» թերթը կը յիշեցնէ, որ Զառայի հայկական գերեզմանատունը քանդուած վիճակի մէջ յայտնաբերուած էր քանի տարի մը առաջ` շրջանը այցելած պոլսահայ «Հայճար» ճարտարապետներու միութեան ներկայացուցիչներուն կողմէ:
Այնուհետեւ, գործարար Ֆեթհի Արասի նիւթական օժանդակութեամբ, գերեզմանատան տարածքին վերականգնողական աշխատանքներ կատարուած են:
Նշենք, որ Զառայի մէջ, մինչեւ 1915, հոծ հայ բնակչութիւն ապրած է: