ՔԱՐԼԱ ԵԱՐՏԸՄԵԱՆ
Ի՞նչ է տարբերութիւնը խաշելուն եւ մասնակիօրէն եփելուն միջեւ
Ճաշը կը խաշենք, երբ սուզենք զայն պաղ եւ անլի ջուրին մէջ եւ ձգենք, որ պարունակութիւնը եռայ կրակին վրայ: Իսկ ի՞նչ է խաշելուն նպատակը: Միսի կարգ մը տեսակներ կը խաշենք, որպէսզի անոնց սուր համը չէզոքացնենք, կամ անոնց մէջ գտնուող աւելորդ աղը ոչնչացնենք: Իսկ բանջարեղէններու պարագային, կրնանք եռացած եւ աղով լուծուած ջուրին մէջ արագ խաշելու ձեւը որդեգրել` պարզապէս կակուղցնելու եւ զայն պատրաստելու եփելու յաջորդ հանգրուանին: Օրինակ` կաղամբի տերեւները կրնանք արագ ձեւով խաշել, եթէ անով լիցք պիտի պատրաստենք, կամ` գետնախնձորը, եթէ զայն յետոյ փուռը պիտի զետեղենք:
Իսկ ի՞նչ կը նշանակէ մասնակիօրէն եփել: Ուտելիքի որոշ տեսակներ մասնակիօրէն կ՛եփենք` նախքան զայն ենթարկելը այլ տեսակի եփելու ձեւերու: Օրինակ, եթէ ստեպղինի մանր կտորներ կ՛ուզենք կարմրցնել իւղով կամ կարագով, զայն նախապէս կարելի է մասնակիօրէն եփել: Ուրեմն, մասնակիօրէն եփելով կը հասկնանք ուտելիքի որոշ տեսակ մը դնել ջուրին մէջ եւ զայն եփել, տաքցնել` մինչեւ որ ջուրը հասնի գաղջ աստիճանի, այսինքն` անմիջապէս նախքան եռալը: Մասնակիօրէն եփելու ընթացքին կաթսային կափարիչը պէտք չէ ծածկել: Մասնակիօրէն եփելը կ՛օգնէ, որ ձուկի, հաւկիթի, պտուղի նման փխրուն ուտելիքներ չփճանան եփելու ընթացքին եւ չկորսնցնեն իրենց համը: Մասնակիօրէն եփելու հիմնական նպատակն է ուտելիքը ո՛չ չափազանց հասունցնել եւ ո՛չ ալ հում պահել, այլ` գտնել միջինը: Մասնակիօրէն եփելու ընթացքին կարելի է ջուրին մէջ աւելցնել համեմներ, կամ օգտագործել հիւթի կամ թացանի որոշ տեսակներ: Երբ բանջարեղէն մը մասնակիօրէն պիտի եփենք, ընտրենք կէս հասածը, որպէսզի ան չկորսնցնէ իր տեսքը. իսկ եփելու ընթացքին պտուղին գոյնը պահպանելու համար զայն կարելի է ծածկել մաքուր լաթով մը եւ ապա զետեղել ջուրին մէջ:
Իսկ ի՞նչ ձեւով կարելի է հաւկիթը մասնակիօրէն եփել` առանց փճացնելու անոր կառոյցը: Շատ պարզ է` մէկ դգալ քացախ աւելցնել մէկ լիթր ջուրին մէջ եւ այդպէս եփել հաւկիթը:
Գիտէ՞ք, թէ մասնակիօրէն եփելը կը պահպանէ ուտելիքին մէջ գտնուող կենսանիւթերը եւ հանքային աղերը, մինչ խաշելու պարագային անոնց մեծ մասը կը կորսուի:
Մասնակիօրէն եփելու ընթացքին իւղի, կարագի եւ ճարպի օգտագործման չգոյութիւնը յարմար ընտրութիւն մը կը դարձնէ զայն` նիհարնալու նպատակով սննդականոնի հետեւողներուն: